Il president da la Republica Federala Tudestga, Joachim Gauck, na candidescha l’auter otg betg pli per ina segunda perioda d’uffizi. Quai ha communitgà il politicher da 76 onns en il chastè Bellevue a Berlin.
I saja ina grond’onur dad esser en uffizi fin il 2017. Però na possia el betg garantir che sia sanadad lubeschia in’ulteriura perioda d’uffizi, ha argumentà Gauck sia decisiun.
Il teolog è vegnì elegì il mars 2012 dad in’allianza da CSU, CDU, FDP, SPD e Verds en il pli aut uffizi public da la Germania suenter che Christian Wulff ha stuì demissiunar pervi dad in scandal da corrupziun. Wulff è be stà 2 onns en uffizi.
L’Assamblea federala tudestga sa raduna ils 12 da favrer 2017 per eleger la successura u il successur da Joachim Gauck.
Reacziuns sin la decisiun da Gauck
La chanceliera tudestga Angela Merkel deplorescha ch’il president tudestg Joachim Gauck na vul betg pli candidar per ina ulteriura perioda d’uffizi. Sco Merkel ha ditg, avess ella giavischà ina ulteriura perioda d’uffizi. L’atun vegnia ella a decider davart la successiun da Gauck.
Er il parsura da la SPD Sigmar Gabriel ha deplorà la decisiun da Gauck.
RR novitads 14:00