- John McCain è stà ina da las figuras las pli impurtantas en la politica americana.
- Dapi il 1987 è il republican stà senatur per il stadi federativ d'Arizona.
- El è mort en consequenza dad in tumor dal tscharvè.
Il senatur republican John Sidney McCain III è mort en la vegliadetgna dad 81 onns. El saja mort la sonda en sia chasa ad Arizona en consequenza da cancer. Quai ha communitgà ses biro. Pir avant in pèr dis aveva el communitgà da desister d’in ulteriur tractament medicinal. El lascha enavos sia dunna Cindy e set uffants.
Praschunier durant la guerra
Durant la Guerra da Vietnam è il pilot da la Navy crudà giu cun ses aviun. Passa tschintg onns ha el passentà en praschun en ils mauns dal Vietcong ch'ha torturà el. Durant sia entira vita è McCain s'exprimì cun vehemenza cunter mintga furma da tortura. Er è el stà per serrar la praschun dispitaivla da Guantanamo sin la Cuba.
In politicher conservativ, ma er dispitaivel
McCain è stà passa 30 onns senatur. Il 2008 è el stà candidat dals republicans per la presidenza. La cursa per la Chas'alva ha el pers cunter il democrat Barack Obama.
John McCain valeva sco in dals pli prominents commembers dal congress insumma e quai sur ils cunfins da sia partida ora. Ultra da quai valeva McCain sco il pli grond criticher da president Donald Trump aifer ils republicans. Uschia ha McCain per exempel renfatschà a Trump dad esser incumpetent. Quai suenter l'inscunter suprem tranter il president american e ses collega d'uffizi russ Wladimir Putin mez fanadur a Helsinki.
Er grazia a McCain n'èsi betg gartegià a l'administraziun da Trump da dismetter «Obamacare».
Trump senza respect
President Trump era adina puspè s'exprimì a moda superbia davart ses criticher. Gia durant ses cumbat electoral ha Trump ditg che McCain na saja betg in erox da guerra per el. Eroxs na sa laschian numnadamain betg arrestar da l'inimi, uschia Trump.
Er las ultimas emnas ha il president adina puspè fatg beffas sur il grev malsaun. Quai dentant senza numnar el explicitamain cun num.
Reacziuns sin la mort da McCain via Twitter
RR novitads 06:00
