Siglir tar il cuntegn

Exteriur Jordania executescha 15 persunas

La Jordania ha executà 15 persunas sentenziadas. Quai rapporta l'agentura da novitads statala Petra sa referind sin la regenza.

Praschun.
Legenda: Las painas da mort èn vegnidas executadas en ina praschun en il sid da la chapitala d’Amman (maletg da simbol). Reuters

Diesch dad ellas sajan vegnidas pendidas pervi dad attatgas terroristicas sin forzas da segirezza. E tranter els duai era esser l’attentader che ha mazzà il schurnalist Nahed Hatter. Il schurnalist era vegnì sajettà giu la fin da settember ad Amman. Hatter avess stuì prender part ad in process cunter el pervia da blasfemia.

Las ulteriuras tschintg persunas sajan tranter auter vegnidas executadas pervi da violaziun ed auters delicts sexuals. Las painas da mort èn vegnidas executadas en ina praschun en il sid da la chapitala d’Amman.

Tranter il 2006 ed il 2014 n’avevi dà naginas sentenzias da mort cun pender en la Jordania.

RR novitads 10:00