Siglir tar il cuntegn
cuntegn

Exteriur Juan Guaidó na po betg pli bandunar pajais

Il tribunal suprem investighescha cunter il president transitoric da la Venezuela, Juan Guaidó perquai ch'el haja surpiglià senza lubientscha il post dal president Nicolas Maduro. Uss na po el betg pli bandunar il pajais e ses contos èn vegnids serrads.

Purtret da Juan Guaidó durant ina conferenza da pressa.
Legenda: Juan Guaidó quinta er da forsa stuair ir en praschun. Keystone

Cun questa decisiun ha il tribunal suprem dà suatientscha al giavisch dal procuratur public. Guaidó era sa declerà sco nov president da la Venezuela. Il procuratur public stat dentant davos il president Nicolas Maduro. Guaidó n'è betg stà surprais da l'agir da la giustia. La suletta resposta dal reschim saja persecuziun ed oppressiun, ha ditg Guaidó. El supponia ch'el pudess er ir en praschun.

USA sustegnan Guaidó

Entant han ils Stadis Unids dà access a Guaidó per contos da la regenza venezolana e da la banca centrala tar bancas americanas. Quai ha communitgà il ministeri da l’exteriur american. Ils Stadis Unids renconuschan Juan Guaidó sco president transitoric da la Venezuela.

RR novitads 06:00