Siglir tar il cuntegn

Header

Navigaziun

cuntegn

Exteriur Juan Guaidó sa declera sco nov president

En la Venezuela escalescha il conflict tranter la regenza da Nicolas Maduro ed il parlament ch’è vegnì privà da sia pussanza: Il president dal parlament, Juan Guaidó è sa declerà sco nov president dal pajais.

  • Il president dal parlament senza pussanza è sa declerà sco president transitoric.
  • Juan Guaidó era vegnì elegì l'entschatta schaner sco president da l'assamblea naziunala che vegn dominada da l'opposiziun.
  • Il president dals Stadis Unids ha gia renconuschì Guaidó sco president transitoric.

Durant ina manifestaziun en la chapitala Caracas è il president dal parlament, Juan Guaidó sa declerà sco nov president dal pajais.

Renconuschientscha internaziunala

Il president american Donald Trump ha gia renconuschì Guaidó sco president transitoric da la Venezuela. Quai ha communitgà la Chas’alva a Washington. Dasper ils Stadis Unids han er il Canada, la Brasilia, il Peru, il Paraguay, la Columbia ed il Chile, sco er l'Organisaziun da stadis americans, OAS, renconuschì Guaidó sco president transitoric da la Venezuela.

Maduro reagescha

En consequenza ha la Venezuela interrut las relaziuns diplomaticas cun ils Stadis Unids. Il persunal diplomatic stoppia bandunar il pajais entaifer 72 uras, uschia Maduro.

Protests da massa en l'entir pajais

Diesch millis persunas han demonstrà cunter il president Maduro. Tar quels cravals èn 13 persunas mortas, quai tenor indicaziuns dal post da surveglianza per conflicts socials en Venezuela.Stadis Unids sustegnan demonstraziuns

Il vicepresident american Mike Pence ha segirà als demonstrants ses sustegn. Maduro ha el titulà sco dictatur che stoppia davent. La regenza a Caracas ha condemnà ils pleds da Pence. Washington appelleschia ad in culp da stadi.

RR novitads 20:00