Il tribunal penal da l'ONU a Den Haag ha sentenzià l'anteriur manader dals Serbs en la Bosnia, Radovan Karadzic, a 40 onns praschun pervi da genocid a Srebrenica. Er pervi da crims da guerra e crims cunter l'umanitad è el vegnì declerà culpant. Ins quinta che Karadzic (70) vegnia ad appellar cunter la sentenzia.
Mazzacra cun 8'000 unfrendas
Sut il commando da Karadzic han truppas serbas assaglì il 1995 la zona da protecziun da l'ONU a Srebrenica ed assassinà 8’000 umens muslims. La mazzacra da Srebrenica vala sco mender crim da guerra en l'Europa dapi la fin da la segunda guerra mundiala. Totalmain èn vegnids per la vita 100’000 umans en la guerra da la Bosnia (1992 fin 1995).
Karadzic era vegnì arrestà pir il 2008, quai suenter 13 onns en fugia. Il process cunter el, en il qual el aveva defendì sasez e cumprovar sia innocenza, ha durà sis onns.
RR novitads 16:00