Kenia: Arrestaziuns ed ulteriuras attatgas

Dus dis suenter la mazzacra en in’universitad en la Kenia, ha la milissa islamista Al-Shabaab da la Somalia smanatschà cun ulteriuras attatgas.

glieud che tegna placats Bild in Lightbox öffnen.

Legenda da maletgs: Solidaritad cun las unfrendas da l'attatga sin l'universitad. Keystone

Naginas mesiras da segirezza na possian evitar ch'ulteriur sang vegnia a currer en las citads da la Kenia, ha la milissa extremista annunzià. Quai saja il pretsch perquai ch'ils burgais sustegnian la politica violenta da la regenza.

Arrestà 5 persunas suspectusas

En connex cun la mazzacra, hajan ins arrestà 5 persunas suspectusas, quai rapportan las medias dal pajais. Tar lur rapport sa basan ellas sin infurmaziuns dal minister da l'intern da la Kenia. Ulteriurs detagls n'èn betg enconuschents.

Ils attatgaders da la milissa islamistica Al-Schaabab avevan mazzà almain 147 persunas a l'universitad en la Kenia e silsuenter mazzà sasez. Els eran armads cun material explosiv ed avevan sajettà enturn senza ponderar.

RR novitads 11:00