Per las organisaziuns d’agid èsi grev da gidar en il Proxim Orient. Hakam Awad lavura per la HEKS, l’Agid da las Baselgias evangelicas svizras, sco directur dals pajais Israel e Palestina. El è naschì e creschì si a Jerusalem ed è palestinais. Dapi set onns lavura el per la HEKS e per il bab da dus uffants datti in avant ed in suenter ils 7 d'october 2023.
Ils projects a Gaza s'èn midads fermamain dapi l'october. Ussa èn quai tut projects d'agid umanitars – pia da guardar ch'i dat avunda da mangiar ed avunda alloschis per la populaziun a Gaza.
Radund 1,7 milliuns persunas èn vegnidas stgatschadas da lur dachasa. Uss abiteschan ellas en scolas u clinicas. La lavur da Hakam Awad e ses team è da garantir ils basegns da basa per questas persunas. Avant la guerra è el pliras giadas per onn ì en la Strivla da Gaza per ses projects. Per exempel han els sustegnì la giuventetgna a chattar lavur u a declerar ad els chaussas economicas. Uss na vegn el sco persuna betg pli en, mo anc organisaziuns d’agid internaziunalas. Dentant è l’access a Gaza grev: tut ils cunfins èn stretgs ed intgins era serrads. Actualmain datti anc il cunfin principal tar l’Egipta ed in auter tar l’Israel. Dentant n'è l’agid ch'entra betg avunda. Er ils collavuraturs da partenaris da la HEKS èn vegnids stgatschads.
Mintga organisaziun ha pers collavuraturs u collavuraturas tar bumbardaments. Quai ha manà tar ina fitg cumplitgada atmosfera da lavur. Quai è er in stress psichic per las persunas ch’èn là per gidar.
Er en ils auters territoris palestinais datti violenza. En il vest da la Jordania surtut da colonists radicals israelians. Quels na laschan ils purs palestinais betg pli sin lur funs. Igl haja era dà attatgas: dà fieu ad autos e chasas ed era sajettims. Hakam Awad spera sin ina pausa da cumbat. El è da l’opiniun ch'i dat avunda plazza en quest pajais per tut las persunas. Per far il pass envers la pasch ston dentant las persunas che mainan Israel e Palestina far decisiuns curaschusas.
Il Film Sar'a
Il reschissur israelian, Michael Kaminer è creschì si en il kibuz Tzor’a. Quest kibuz è vegnì construì il 1948 sin ils rests da la vischnanca palestinaisa Sar'a. Nagin n'ha discurrì sur da quai, ed uschia è Michael Kaminer pir vegnì a savair quai cura ch’el aveva 40 onns. El ha legì quai en l'internet ed ha vitiers anc vesì fotografias veglias nua che differentas chasas èn da vesair. Uschia ha el cumenzà a lavurar si questa istorgia e confruntà diversas persunas cun quai: persunas israelianas ch'han fundà il kibuz e cun figlialanza da persunas che abitavan en la vischnanca Sar'a.
