L'Uniun cristian-democratica tudestga (CDU) ha elegì ina nova presidenta da la partida naziunala, e successura ad Angela Merkel. Al di da partida da la CDU a Hamburg ha la partida elegì Annegret Kramp-Karrenbauer. Quai però pir en il segund scrutini. Perquai che nagin dals candidats aveva survegnì ina maioritad en l’emprim scrutini, hai dà ina elecziun decisiva tranter Kramp-Karrenbauer e Friedrich Merz. Là ha l'anteriura primministra dal Saarland survegnì 52% da las vuschs. Il minister da sanadad Jens Spahn era crudà ora gia suenter l'emprim scrutini.
Elecziun da tagl tranter Kramp-Karrenbauer e Merz
L'actuala secretaria generala da la CDU Annegret Kramp-Karrenbauer aveva en ses pled appellà a curaschi. La partida na dastgia betg guardar tementada vers la sanestra e la dretga. Il cuntracandidat Friedrich Merz persuenter ha punctuà ch'il di da partida stoppia dar in signal da partenza per l'innovaziun. Senza posiziuns cleras na dettia quai era betg dapli success tar elecziuns.
Angela Merkel resta chanceliera federala, però …
En ses ultim pled sco scheffa da la CDU ha Angela Merkel sezza appellà dad esser unanim e resolut. Mo uschia possia la partida avair success era en temps da polarisaziun ed AfD, ha ditg Merkel. Tge che disputs interns portian a la CDU e CSU, hajan ils ultims onns mussà.
RR novitads 18:00