Siglir tar il cuntegn
Inhalt

Exteriur L’ambassadura americana tar l’ONU banduna ses post

Surprendentamain sa retira l’ambassadura Nikki Haley. Ch’ella chalia la fin da l’onn, ha ditg suenter in inscunter il president Donald Trump. Daco che Haley banduna ses post n’è betg cler il mument.

Nikki Haley e Donald Trump.
Legenda: Donald Trump annunzia che Nikki Haley dettia ses post tar l’ONU sin la fin dal 2018. Keystone

Cumenzà en il post d’ambassadura tar las Naziuns Unidas il schaner 2017, aveva la dunna da 46 onns bunamain senza enconuschientschas diplomaticas. En las sesidas da l’ONU è ella adina sa preschentada resoluta. Ed ella ha procurà che las ideas da Trump per in’ONU pli schlanca, quai vul dir damain daners americans per il preventiv e per missiuns da pasch, sa realiseschian era.

Dapi che Donald Trump ha surpiglià il presidi american il schaner 2017, hai da bleras midadas da persunal en ils pli auts posts da la regenza. Nikki Haley aveva scrit il mais passà en in artitgel per la «Washington Post», ch’ella na giaja betg d’accort en tut ils puncts cun Trump. Ella saja però superbia da servir en sia regenza.

RR actualitad 17:00