La decisiun dal Tribunal federal menziunescha era, che la Procura publica federala tschertga ulteriuras infurmaziuns en pajais esters. Uschia prevesa la procura d’interrogar la dunna da Sonko che viva en ils Stadis Unids, e l’incumbensà spezial american Christof Heyns. Ulteriuras interrogaziuns èn previsas cun persunas en la Gambia sezza, en la Germania ed en ils Stadis Unids.
Laschà torturar persunas
Ad Ousman Sonko vegn rinfatschà d’esser responsabel per acts da tortura ed acts cunter l’integritad sexuala, commess da policists ed autras persunas suttamessas ad el. Succedidas èn quellas tranter il 2006 ed il settember 2016, cura che Sonko era inspectur general da la polizia da la Gambia e minister da l’intern. Dapi il schaner 2017 è il politicher en Svizra en praschun. Avant avev’el vivì plirs mais sco requirent d’asil en il chantun Berna.
RR actualitad 14:00
