L'attentader da Strasbourg aveva engirà sia fidaivladad a la gruppa da terrur Stadi Islamic (SI). Investigaders hajan chattà in video da l'attentader che mussia l'engirament da fidaivladad, ha inditgà la giustia franzosa.
Gia curt suenter l'attatga aveva la gruppa da terrur SI pretendì che l'um da 29 onns saja in da lur «schuldads». El saja suandà l'appell dad attatgar burgais da stadis commembers da la coaliziun cunter la gruppa SI en la Siria ed en l'Irac. Il ministeri da l'intern franzos era da lezzas uras però sa mussà sceptic.
Ils 11 da december aveva l'um sajettà sin persunas en in martgà da Nadal a Strasbourg. 5 persunas èn mortas. Suenter ina tschertga da dus dis è l'attentader vegnì sajettà giu da la polizia.
RR novitads 18:00
