Siglir tar il cuntegn

Header

cuntegn

Exteriur L'Austria construescha ina saiv da cunfin al Brenner

L’Austria ha prendi mesiras per controllar meglier ils cunfins envers sid. Tranter auter duai vegnir construì ina saiv da cunfin. Questa mesira cuntrafetschia dentant al dretg europeic, ha ditg il minister dal exteriur da l’Italia.

Dasper la saiv vegnan installads posts da controlla sin l’autostrada sco er sin la via federala. Uschia duai vegnir construir al Brenner ina saiv da 370 meters cun 5 posts da controlla. 4 da quests posts sin l’autostrada ed in post da cunfin a la via federala.

Era duai il traffic da viafier vegni franà a Steinbach am Brenner per pudair controllar ils passagiers. Quai ha la direcziun da la polizia dal Tirol communitgà.

Controllas dependentas da la situaziun

Cura che las mesiras van en vigur è dentant anc avert. Las controllas na sajan dentant betg dependentas da la fin dals posts da controlla, sulet ils moviments da fugitivs sajan decisivs per cumenzar cun las controllas, ha ditg il directur da polizia dal Tirol Helmut Tomac. Il mument na dettia quai nagin basegn da cumenzar cun controllas al cunfin tranter l’Italia e l’Austria.

Roma sa mussa malcuntents

Politichers talians han appellà a la regenza austriaca da reponderar talas mesiras al Brenner. Il minister dal exteriur talian Paulo Gentiloni ha cuntradi al argument da la regenza austriaca ch’il dumber da fugitivs fetschia da basegn talas controllas da cunfin. «Dad ina invasiun essan nus anc lunsch davent», ha ditg Gentiloni a la gasetta austriaca «Die Presse». Las mesiras planisadas da l’Austria na sajan betg giustifitgadas ed era cuntrafetschian era al dretg europeic. Il primminister talian, Matteo Renzi ha ditg ch'ils plans na cuntrafetschian betg mo al dretg da l'UE, mabain negligeschian l'istorgia da l'Europa.

RR novitads 17:00

Artitgels legids il pli savens