Siglir tar il cuntegn

Header

Ina bartga bandunada sin l'insla Lesbos en Grezia.
Legenda: Ina bartga bandunada sin l'insla Lesbos en Grezia. Reuters
cuntegn

Exteriur L'emprima giada in di senza novs fugitivs sin inslas egeicas

Per l'emprima giada dapi la cunvegna da fugitivs tranter l'UE e la Tirchia n'èn nagins novs migrants arrivads sin las inslas greccas durant las 24 uras precedentas. Quai ha communitgà l'autoritad da migraziun ad Athen.

La cunvegna è en vigur dapi la notg sin dumengia. Ils emprims trais dis suenter questa cunvegna èn il prim 1’600, lura 600 e la finala 260 fugitivs arrivads. Ch'i ha dà ier nagins novs migrants a bartga ha eventualmain era da far cun il fatg ch’igl è dapi ier fitg burascus sin la Mar Egeica.

Dapli persunal per dumagnar l'administraziun

Tenor cunvegna cun l'UE prenda la Tirchia enavos tut ils fugitivs ch'entran illegalmain en la Grezia. Per mintga fugitiv sirian purtà enavos en Tirchia vul l’UE prender si in Sirian, quai directamain ord la Tirchia.

Ina part da la cunvegna prevesa l’examinaziun da dumondas d’asil en champs da registraziun (hotspots) en Grezia. Per la realisaziun vul l’UE metter a disposiziun numerus ulteriurs policists ed auter persunal.

Tenor stimaziuns èn l'onn passà radund 850'000 fugitivs arrivads en l'Europa dal nordvest sur la ruta dal Balcan (via Tirchia e Grezia).

RR novitads 15:00

Artitgels legids il pli savens

Scrollar a sanestra Scrollar a dretga