Il 2004 ha in tsunami devastà grondas parts da la provinza Aceh sin l'insla Sumatra. L'agid umanitar è stà grond. Ma las organisaziuns internaziunalas n'han betg mo purtà agid, mabain per part era vulì derasar lur ideologias sin l'insla indonaisa. Ord questas experientschas ha la regenza emprais e perquai è ella uss fitg restrictiva cun reparter lubientschas d'entrar en il lieu da la catastrofa.
Ils emprims aviuns sgolan puspè
Avant ch'ils emprims meds èn arrivads en il center enturn Palu ha la plazza aviatica el lieu stuì vegnir reparada. Tenor Pascal Nufer, correspundent da SRF sgolian uss emprims aviuns. A Makassar, en il sid da l'insla stettian organisaziuns umanitaras e schurnalists en colonna per arrivar en il lieu da disgrazia.
Malgrà che jau sun gia stà avant 14 onns en la regiun dad Aceh suenter il tsunami devastant, na sai jau betg sco jau reagesch sin quai che spetga mai a Palu. Igl è dentant mia obligaziun da rapportar da quai che capita uss en la regiun da catastrofa.
Vias stuppadas en ed or dal lieu da catastrofa
In collega schurnalist da Pascal Nufer è charrà avant pacs dis cun auto da la costa siadora. El haja rapportà da vias sbuvadas e stuppadas cun camiuns indonais ch'avessan da purtar emprims meds d'agid en la regiun enturn Palu. Da l'autra vart saja era il traffic ord la zona da catastrofa grond, cunquai ch'ils survivents vulessan simplamain bandunar quest lieu.
RR actualitad 12:00