Siglir tar il cuntegn

Exteriur L’Irac elegia ses parlament

Dals 37 milliuns abitants èn vegnids clamads 24 milliuns a las urnas. I sa tractia dad eleger da 7’000 candidats parlamentaris per 329 sezs. Ils emprims resultads vegnian spetgads intginas uras suenter ch’ils locals èn vegnids serrads, scrivan las agenturas da novitads.

Um ch'è stà ad eleger.
Legenda: Passa 24 milliuns iracais èn clamads a l’urna – igl è l’emprima elecziun suenter la fin da la milissa terroristica SI. Keystone

L’Irac saja uss suenter la victoria cunter la milissa terroristica Stadi Islamic en ina fitg impurtanta fasa. Uss giaja per ses futur, ha ditg la scheffa dal IKRK en l’Irac a l’agentura da novitads DPA.

Svanir cun l'elita, cun ils «squagls da la corrupziun»

Uschia hajan er exprimi blers ils desideri da midar ora l’elita politica suenter trais onns guerra cunter la milissa terroristica SI. L’agentura da novitads franzosa AFP rapporta, che blers Iracais hajan annunzià, independentamain da lur cretta u lur provinza, da vulair stgatschar «ils squagls da la corrupziun». La lezia principala dal nov parlament vegn ad esser quella da survegliar la reconstrucziun dal pajais.

30 milliardas dollars per refar il pajais

L’Irac aveva numnadamain survegnì il favrer 30 milliardas dollars en furma dad engaschi internaziunal per cuntanscher quella finamira. La populaziun tema dentant, ch’ils raps giajan a finir en las giaglioffas dals politichers.

«Jau hai votà per in candidat, che n’era anc mai en la politica. Jau sper, che quests novs prendian si il giavischs dals Iracais che pateschan dapi radund 15 onns da la corrupziun» citescha l’AFP ad in Iracais che deriva dal sid da Bagdad.

Er a Mossul vulan ils Iracais e las Iracaisas finalmain ina midada

Er la glieud da Mossul, l’anteriura «chapitala» iracaisa dal SI en il nord dal pajais, veglia in nov cumenzament. Els èn vegnids libers dal SI pir avant radund 10 mais. Adina puspè haja il SI predegià en las moscheas, che la democrazia saja la fin da l’Islam.

Eleger saja stà l medem sco in putgà pels dschihadists, quinta in schurnalier a l’AFP. Ina dunna vul, che la vusch da las dunnas haja finalmain puspè paisa. Ella haja stuì restar durant il reschim dal SI en sia citad trais onns be en chasa.

Er sch’i dat pli e pli paucs acts da violenza suenter ch’il SI è stgatschà da quasi tut la regiun èn vegnids mobilisads radund 900’000 policists e schuldads per segirar las elecziuns.

RR novitads 10:00+