Siglir tar il cuntegn
cuntegn

Exteriur L'ONU condemnescha tests da rachetas da la Corea dal nord

L'ONU fa quitads pervi dal sa cuntegnair provocativ da la Corea dal nord. Els condemneschan era ils test da rachetas che la Corea dal nord fa l'ultim temp. Quai destabiliseschia la situaziun.

Purtret dal bajetg da l'ONU a New York.
Legenda: A New York èn ils commembers dal Cussegl da segirezza da l'ONU sesids ensemen. Keystone

La decleraziun ch'ils Stadis Unids han lantschà è vegnida acceptada da l'ONU senza cuntravusch. La Corea dal nord aveva sajettà il gliendisdi quatter rachetas en la mar giapunaisa ed uschia puspè provocà ils Stadis Unids ed ils pajais vischins. Tenor indicaziuns dal Giapun sajan trais rachetas sa tschentadas en la zona dal Giapun.

La Corea dal nord provochescha adina puspè la communitad mundiala cun ses tests da rachetas. L'onn passà ha la Corea dal nord fatg dus tests cun armas atomaras ed ina retscha da tests da rachetas. Cun questas acziuns ha Pjöngjang cuntrafatg a pliras resoluziuns dal Cussegl da segirezza da l'ONU.

Dapi l'emprim test cun armas atomaras il 2006 ha l'ONU gia decidì sis rundas da sancziuns cunter la Corea dal nord.

RR novitads 08:00