Siglir tar il cuntegn
Inhalt

Exteriur L’UE suenter il Brexit: «Nus tegnain ensemen»

Envid ad inscunter da crisa a Berlin e parolas per tegnair tras: Da tut las varts rivan las reacziuns tar il Brexit.

Suenter la decisiun da la Gronda Britannia, da sortir da l'UE, ha la chanceliera tudestga Angela Merkel annunzià per glindesdi in inscunter da crisa europeic. Ch’i na dettia nagut da discurrer enturn: «Il di dad oz è ina cesura per Europa, el è ina cesura per il process da l’unificaziun.» En sia reacziun sin il Brexit sa mussa Merkel dentant segira: «L'Uniun europeica è ferma avunda per dar las dretgas respostas sin il di dad oz.»

Berlin - inscunter da crisa il glindesdi

Per il glindesdi ha Merkel envidà il president dal cussegl da l'Europa Donald Tusk, il schef da la regenza taliana, Matteo Renzi ed il president franzos François Hollande ad in inscunter da crisa a Berlin. Il president da la cumischiun europeica, Jean-Claude Juncker, pretenda in cler votum da la Frantscha e da la Germania. La situaziun da malsegirtad na dastgia betg durar lunsch.

Brüssel - decidì da tegnair ensemen

Deploraziun e respect per la decisiun da la populaziun britannica, l’UE vegn dentant a tegnair ensemen vinavant: quai è la posiziun cuminaivla dal schef da la cumissiun da l’UE Jean-Claude Juncker, il president dal cussegl Donald Tusk, il schef dal parlament da l’UE Martin Schulz ed il president dals Pajais Bass Mark Rutte. Ils Pajais Bass mainan actualmain ils affars da l’UE.

Fenadur - inscunter suprem da l'UE

Il capos da stadis e da regenza da l’UE vulan tenor il minister da l’exteriur da la Lettonia, Edgar Rinkevic, sa radunar il fanadur ad in inscunter suprem spezial per tractar da las consequenzas dal Brexit.

RR novitads 14:00+