Siglir tar il cuntegn
cuntegn

Exteriur «L’ultim tango» – il reschissur Bernardo Bertolucci è mort

Suenter lunga malsogna è il reschissur talian Bernardo Bertolucci mort en la vegliadetgna da 77 onns a Roma. Quai rapporta l’agentura da novitads SDA.

Il reschissur en sutga da rodas.
Legenda: Bernardo Bertolucci il reschissur durant il festival da film a Venezia. Keystone

Bertolucci è enconuschent ad in public vast tras ses films «Ultimo tango a Parigi», «Novecento» e «The Last Emperor». Quest film che tracta l'istorgia dad in imperatur chinais, saja pli probabel quel che haja gì il pli grond success, scriva l'agentura da novitads SDA. Il film dal 1987 era vegnì onurà cun 9 Oscars e 4 Golden Globes. Suenter ina pausa da diesch onns era Bertolucci turnà cun «Io e te» il 2012 en il kinos.

Il reschissur talian vala sco in dals gronds dal kino talian. Uschia scriva la gasetta «La Repubblica» da «l'ultim grond maister dal film talian». El na saja betg be stà reschissur, ma er poet, producent, polemicher ed autur brigliant.

La Repubblica tar la mort da Bertolucci

Dapi dus onns saja el stà en la sutga cun rodas pervi dad in'operaziun malgartegiada vi da la spina dorsala. Bernardo Bertolucci haja patì da cancer, citescha l'agentura da novitads tudestga DPA ina pledadra da Bertolucci.

RR novitads 12:00