Siglir tar il cuntegn

Header

cuntegn

Exteriur La Corea dal Nord vilenta puspè il mund

La Corea dal Nord ha vilentà il mund. Suenter il pli nov test da bumba nord-corean vegn il pajais crititgà vehementamain. Via il servetsch da novitads Twitter ha er Donald Trump fatg a savair sia posiziun.

Il president franzos Emmanuel Macron ha discurrì dad ina provocaziun. El vul ch’il Cussegl da segirezza da l’ONU reageschia svelt al test da Corea dal Nord. Per il schef da l’autoritad internaziunala d’energia nucleara IAEA è l’ultim test nuclear da la Corea dal Nord «fitg deplorabel».

Ina posiziun uffiziala da la Chas’alva na datti anc betg.

Donald Trump: «La Corea dal Nord è ina naziun-carugna»

Il president american Donald Trump ha dentant gia reagì via il servetsch da Twitter cun trais novitads curtas. Uschia cuntinueschian ils pleds e las acziuns da la Corea dal Nord dad esser «fich ostils e privlus» per ils Stadis Unids, scriva Trump. la Corea dal Nord saja ina «naziun-carugna» che «chapeschia be in'unica chaussa». Tge chaussa precis na precisescha il president.

La Corea dal Nord aveva annunzià la dumengia en la televisiun statala Kctv dad avair fatg in test dad ina bumba idrogenica.

Il test saja «reussì perfetgamain». Quai ha declerà la moderatura curt suenter che quest sisavel experiment nuclear era vegnì fatg a mezdi (05:30 temp svizzer) en vischinanza da la chapitala Pyongyang.

La terra tremblava en las regiuns en il nord-ost da la China

Il sisavel test atomar da la Corea dal Nord ha fatg tremblar la terra en la China: Uschia rapporta l’agentura da novitads statala chinaisa Xinhua, che las chasas da la cità da Yanji hajan trembladas. Yanji ha 650’000 abitantas ed abitants. Er divers utilisaders da la rait han rapportà dad esser fugids or da lur chasas pervi dal terratrembel.

Ina charta seismologica cun dus mauns.
Legenda: Experts en l’institut seismologic en la Corea dal Sid: Els analiseschan il terratrembel suenter in test atomar da la Corea dal Nord il 2016. Keystone

China, l’ultim allià, crititga vehementamain

Il ministeri da l’exteriur chinais ha annunzià la dumengia da «refusar cumplettamain e condemnar fermamain» l’agir da la Corea dal Nord. Cun il test da rachetas haja la Corea dal Nord ignorà, che «la cuminanza internaziunala refusa cumplettamain» quest agir.

Che la Corea dal Nord testescha adina vinavant armas atomaras vilenta la China pli e pli. Perquai aveva er Peking vuschà il mais passà per novas sancziuns severas dal cussegl da segirezza da l’ONU cunter la Corea dal Nord.

Instituts seismologics conferman nov test

Umans en unifurma applaudeschan.
Legenda: Applaus sin via en la Corea dal Nord: Ils umans guardan als 30 d’avust las novitads da televisiun. Keystone

L’institut seismologic dals Stadis Unids e quel da la China avevan registrà la dumengia a bun'ura in terratrembel da la fermezza 6,3 en il nordost dal pajais isolà. Quel saja capità en ina profunditad da nulla meters. Perquai avevan ils experts gia suppona, ch’i sa tractia da la stremblida dad in'explosiun atomara.

Conflict cun la Corea dal Nord escalescha e cuntinua ad escalar

Il conflict sin la peninsla coreana s'intensivescha dapi mais pli e pli. Malgrà sancziuns pli e pli severas davart da las Naziuns Unidas ONU e squitsch davart la cuminanza internaziunala ha fatg la Corea dal Nord la dumengia ses sisavel test dad in’arma nucleara.

Bumbas idrogenicas valan pervi da lur forza explosiva sco armas anc pli desastrusas sco bumbas atomaras solitas.

RR novitads 06:00++

Artitgels legids il pli savens