Siglir tar il cuntegn

Header

cuntegn

La fin da l'onn 2021 Bunamain 37 milliuns uffants en fugia

Sin l’entir mund eran bunamain 37 milliuns uffants en fugia la fin da l'onn 2021 . Tenor l’Ovra d’agid per uffants da las Naziuns Unidas èn quai uschè blers sco dapi la Segunda Guerra mundiala betg pli. La fin da l’onn passà sajan ils uffants vegnids stgatschads da lur chasas ed abitaziuns tras conflicts, violenza ed autras crisas. Cumpereglià cun l'onn 2020 èn quai 2,2 milliuns dapli.

La raschun per quest grond dumber è tranter auter ina consequenza dals conflicts en l'Afghanistan ed il Jemen che n'han nagina fin. Radund 7,3 milliuns uffants èn en fugia pervia da catastrofas da la natira.

Cifras d'avant la guerra en l'Ucraina

La statistica n’ha anc betg resguardà la guerra en l’Ucraina. Gia gievgia ha l’Autcumissariat da las Naziuns Unidas per ils fugitivs UNHCR annunzià che var 100 milliuns umans sajan actualmain en fugia sin l’entir mund.

RTR novitads 12:00

Artitgels legids il pli savens