Siglir tar il cuntegn
Inhalt

Exteriur La Germania fa urden suenter ils G20

476 policists blessads, donns e devastaziuns – malgrà las lungas preparaziuns sa mussan las autoritads surpraisas da las dimensiuns da la brutalitad. Il president da la Germania Frank-Walter Steinmeier saja scurlattà da quai ch’el haja vesì ad ina visita a Hamburg, rapportan las agenturas.

Els dus discurran avant ils policists.
Legenda: Olaf Scholz (san.) e Frank-Walter Steinmeier (dr.) sa mettan davant la polizia da Hamburg. Keystone

Il president tudestg Frank-Walter Steinmeier è sa mussà schoccà dals cravals grevs a Hamburg durant l’inscunter dals G20. Quai ch’el haja vesì haja «scurlattà» el e fetschia el «consternà», ha ditg Steinmeier tar in visita a Hamburg.

Steinmeier: Reconuschientscha ed engraziament a la polizia

Demonstraziuns talmain violentas n’haja la Germania betg gì ils onns passats. Intgins hajan sa cumportà «senza resguard e cun ina furia destructiva senza cunfins». Steinmeier ha engrazià explicitamain als policists per lur lavur. Els na meritassian betg be reconuschientscha ma er engraziament. Els hajan prestà lur servetsch per la segirezza e protegì il dretg da sa radunar.

Portrait dad el.
Legenda: Hartmut Dudde, il manader da l’acziun da las forzas da segirezza durant l’inscunter dals G20. Keystone

476 policists blessads, 186 arrestads e 225 en fermanza

Quai èn las cifras or da la bilantscha ord vista da las autoritads, communitgadas la dumengia dal manader da l’acziun Hartmut Dudde. Da las persunas arrestadas sajan 132 da la Germania, 8 da la Frantscha e 7 da l’Italia, scriva l’agentura da novitads Reuters.

Critica, ch’ella haja reagì massa tard sin ils cravals en il Schanzenquartier, renviescha la polizia: Pervi da la gronda violenza duvrada cunter ils policists hajan stuì vegnir mobilisadas unitads spezialas cunter ils extremists.

Portrait Scholz.
Legenda: Olaf Scholz conceda d’avair fatg naufragi cun sia visiun dad in inscunter segir dals G20. Keystone

Scholz: Finamira dad in inscunter segir ha fatg naufragi

Il president da la citad da Hamburg, fin uss adina suveran suveran, haja fatg bilantscha cun fatscha sblacha, rapportan las agenturas da novitads. Suenter ils gronds excess da violenza ha Olaf Scholz concedì d'avair fatg naufragi cun sia finamira d'in inscunter dals G20 ch’è segir per la politica e per la populaziun.

Ins haja mess a disposiziun a la polizia tut quai ch'ella haja dumandà. Ch'i haja tuttina dà violenza massiva saja irritond. Critica envers la polizia ha Scholz dentant renvià. El na possia betg chapir sche la lavur vairamain eroica da la polizia vegnia crititgada uss u ils proxims dis.

Herr Scholz, wir müssen reden è scritg sin in transparent.
Legenda: L’inscripziun vi dad ina terrassa en il Schanzenviertel mussa, che la discussiun politica vegn a cuntinuar. Keystone

Cler è dentant gia uss: Er Olaf Scholz sez vegn a restar en il focus da la critica. La discussiun davart la responsabiltà politica ha pir cumenzà.

RR novitads 18:00