Siglir tar il cuntegn

Header

Persunas nepalaisas en panica.
Legenda: Il nov terratrembel ha danovamain mess millis persunas nepalaisas en panica. Keystone
cuntegn

Exteriur La glieud en in Nepal è schoccada

17 dis suenter il terratrembel cun passa 8'000 morts en il Nepal, hai dà in ulteriur terratrembel. L'intensitad è stada almain 7,1.

Ina famiglia nepalaisa sin la fugia.
Legenda: Ina giuvna famiglia nepalaisa sin la fugia a Kathmandu suenter il nov terratrembel. Keystone

Confermà

  • In segund terratrembel en la vischinanza da Kathmandu.
  • Instituts geologics internaziunals conferman l'intensitad tranter 7,1 e 7,4.
  • ONU conferma che bajetgs sajan crudads ensemen.
  • Almain 70 persunas èn vegnidas per la vita e passa 1'200 persunas blessadas tenor il ministeri da l'intern.

L'epicenter dal terratrembel saja stà mo paucs tozzels kilometers en l'ost da la chapitala Kathmandu - en la citad Namche Bazar, datiers dal Mount Everest. Tenor correspundents da l'agentura da novitads tudestga dpa regia panica sin las vias a Kathmandu. Tut las persunas sajan curridas ora sin via.

Charta che mussa l'epicenter dal terratrembel dals 12-5 en il Nepal.
Legenda: L’epicenter dal nov terratrembel è stà 83 kilometers en l’ost da Kathmandu ed en la vischinanza dal cunfin cun la China. Keystone

Intensitad almain 7,1

L'intensitad dal terratrembel n'è betg exact clera. L'agentura da novitads dpa inditgescha 7,4 e citescha il Center tudestg per la perscrutaziun da la geologia a Potsdam. L'agentura da novitads Reuters citescha l'uffizi american "Geological Survey" ch'inditgescha in'intensitad da 7,1. Stremblidas hajan ins perfin sentì en la chapitala da l'India Neu-Dehli.

Segund terratrembel aifer 3 emnas

Tar il terratrembel da 7,8 dals 25 d'avrigl eran passa 8'000 persunas mortas. Lura sa chattava l'epicenter en il vest da Kathmandu. Il terratrembel aveva ruinà 100'000s chasas.

RR novitads 10:00/11:00/12:00

Artitgels legids il pli savens

Scrollar a sanestra Scrollar a dretga