Siglir tar il cuntegn

Exteriur La Grezia al precipizi

La Grezia è en ina situaziun difficila e stat a l'ur dal bancrut. La fin da zercladur va il program d'agid afin. Mo gia uss è cler che quel sto atgnamein vegnir prolungà. Ils quitads influenzeschan era ils martgads europeics. La gasetta tudestga Bild rapporta che Berlin sa preparia sin il concurs.

persunas che protestan cunter la povradad, dus placat cun scrittira greca
Legenda: En Grezia protestan ils abitants cunter la povradad. Keystone

Per la Grezia è ina cunvegna cun ils crediturs pussaivla, quai ha ditg il minister Alekos Flambouraris en la televisiun statala. I vegnia a dar ina cunvegna, perquai ch'in bancrut na saja per nagin d'avantatg. Ils 18 da zercladur sa raduna la gruppa da l'euro ina giada dapli davart la crisa da finanzas. Tenor diplomats vegnia era discutà da prolungar il program d'agid per ulteriurs 3 mais.

L'atmosfera è miserabla

Ludivina Petridis da Mustér ha vivi 38 onns en Grezia, 15 onns ha ella lavurà tar l'ambassada Svizra. Dapi il 2013 viva ella puspè en Svizra. Mo tuttina ha Ludivina Petridis anc adina blers amis e parents en Grezia. La populaziun greca saja fitg consternada. Els sajan frustrads, malcuntent ed era malsegirs. Resumà pon ins dir che l’atmosfera en Grezia saja actualmain simplamain miserabla. Ma Ludivina Petridis menziuna era ch’ils Grecs han ina mentalitad fitg positiva. Els pensian adina ch’ins chattia la fin finala anc in soluziun.