Siglir tar il cuntegn

Header

cuntegn

Exteriur La Grezia stat avant la malura

Suenter che la regenza grecca ha annunzià da laschar decider il pievel davart il program da spargn, refusa la gruppa da l'euro da prolungar il program d'agid per il pajais. Quai ha ditg il schef da la gruppa da l'euro, Jeroen Dijsselbloem suenter l'inscunter da crisa a Brüssel.

Ils fatgs d'enfin qua:

  • Regenza greca vul laschar decider il pievel ils 5 da fanadur
  • La gruppa da l'euro na vul betg prolungar il program d'agid suenter ils 30 da zercladur
  • Parlament grec debattescha tuttina davart il referendum
  • Ils Grecs sblundregian ils automats da daners

Cun la decisiun da la gruppa da l'euro da betg prolungar il program d'agid, crudass l'agid da milliardas cun la fin da zercladur e las tractativas tranter ils crediturs ed il pajais en la crisa smanatschan definitivamain da far naufragi.

Ministers da finanzas sincereschan la stabilitad en la zona da l'euro

Ils 18 minister da finanzas da l'euro han entant sincerà lur veglia da rinforzar l'uniun monetara. Ils stadis commembers da la zona da l'euro hajan l'intenziun da nizzegiar tut ils instruments per salvar l'integritad e la stabilitad dal territori da l'euro, hai num en ina decleraziun.

Sco quai ch'il minister da finanzas franzos Michel Sapin ha ditg veglian tut ils 18 ministers da finanzas tegnair la Grezia en la zona da l'euro, tuttina quant grondas che quellas sajan.

Athen sto prender mesiras d'urgenza finanzialas.
Autur: Jeroen Dijsselbloem schef da la gruppa da l'euro

La fin dal program d’agid sforzia la Grezia da prender mesiras d’urgenza finanzialas, ha ditg il schef da la gruppa da l’euro Jeroen Dijsselbloem. Perquai duaja dar agid tecnic da las instituziuns dals crediturs internaziunals. Detagls n’ha el però betg numnà.

Il primminister Alexis Tsipras insista sin la votaziun dal pievel.
Legenda: Il primminister Alexis Tsipras insista sin la votaziun dal pievel. Keystone

Tenor il primminister grec Alexis Tsipras duai la votaziun dal pievel davart il program da spargn per la Grezia avair lieu la dumengia proxima er sche las tractativas davart ulteriur agid finanzial han fatg naufragi.

La Grezia vegn a surviver.
Autur: Alexis Tsipras primminister grec

La Grezia vegnia a surviver, independent da la decisiun da la gruppa da l'euro da betg prolungar il program d'agid, uschia Tsipras envers la chanceliera tudestga Angela Merkel ed il president franzos François Hollande.

Varoufakis critgeschan decisiun da la gruppa da l'euro

Il minister da finanzas grec Yanis Varoufakis ha crititgà vehementamain la decisiun da la gruppa da l'euro da betg prolungar il pachet d'agid. El temia che questa decisiun vegnia a donnegiar la reputaziun da la gruppa da l'euro sco instituziun democratica, ha ditg Varoufakis avant las medias a Brüssel.

Lungas collonas avant ils automats da daners: Ils Grecs en malsegirs tge che capita suenter la decisiun a Brüssel.
Legenda: Lungas collonas avant ils automats da daners: Ils Grecs en malsegirs tge che capita suenter la decisiun a Brüssel. Keystone

Parlament grec fa la giatta morta

Ad Athen fa il parlament grec entant la giatta morta en vista al naufragi pussaivel da las tractativas cun ils crediturs internaziunals. El debattescha davart il referendum ch'il primminister Alexis Tsipras ha annunzià questa damaun. Ina dumonda averta è sch'il referendum sa cunfa insumma cun la constituziun grecca.

Blers Grecs teman da l'intschertezza

En vista a la situaziun intscherta han blers Grecs cuntinuà oz da retrair daners. Avant ils automats hai dà lungas colonnas ed ils automats èn per part vegnids svidads dal tut.

RR novitads 18:00 / 21:00 / 23:00

Artitgels legids il pli savens