- Era la Svizra ha fatg il pass en l’onn nov – pli ruassaivel ch’era gia.
- I dovra 26 uras, da las 11:00 da Silvester temp da l’Europa Centrala fin las 13:00 dal Bumaun – fin che l’entir globus è arrivà en l’onn nov.
- Sco il Bumaun 2021 – procura era quest onn il coronavirus per autras festivitads sin l’entir mund, che quai ch’ins è disà.
En Svizra è la notg da Silvester sin Bumaun stada plitost ruassaivla. Quai era sche Svizras e Svizzers han, malgrà corona fatg in pau party – ed èn stads ensemen en il privat. L'agentura da novitads Keystone-SDA ha dumandà la polizia en plirs chantuns, e da Son Gagl a Turitg fin a Soloturn hai gì num che la polizia haja gì da far pli u main sco ordinari. Incaps spectaculars n'hajan ins betg registrà, ha per exempel la polizia chantunala dal Son Gagl declerà.
En l'entira Europa han tschients milliuns da persunas beneventà il 2022. Quai era cun la speranza da bainprest pudair surmuntar la pandemia da corona.
Blera glieud sin ils Champs-Élysées
A Paris per exempel ha ina gronda fulla da glieud emplenì ils Champs-Élysées – cun mascrina, e malgrà che l'alcohol era scumandà sin las vias.
A Berlin èn sa radunadas pliras milli persunas datiers dal Brandenburger Tor, era sche la gronda party da Silvester era stritgada. Suenter mesanotg ha la gronda part da la glieud puspè bandunà il lieu.
A Madrid è la gronda party tradiziunala da Silvester puspè stada, sin la plazza Puerta del Sol. Dentant sulet circa 40 pertschient dal dumber da persunas usità, han dastgà esser da la partida.
A Sydney en l’Australia han dieschmillis d’aspectaturas ed aspectaturs puspè dastgà giudair il fieu artifizial avant la culissa dal bajetg da l’opera – cuntrari a la davosa midada da l’onn. Tgi che ha vulì vesair il spectacul d’in dals radund 30 puncts cun buna vista, han stuì cumprar in bigliet.