Uschia vulan la NATO e l’Uniun Europeica cumbatter en avegnir communablamain la migraziun illegala. L’emprim pass en questa direcziun saja la cooperaziun da la NATO cun la Frontex. La Frontex è l’agentura da l’UE che cumbatta ils cuntrabandists d’umans en la mar Egeica.
L’UE e la NATO èn confruntadas oz cun ils medems privels.
Las fermezzas da l’UE e da la NATO cumpletteschian ina l’autra e perquai saja ina collavuraziun pli stretga raschunaivla, ha ditg il president dal Cussegl da l’UE Donald Tusk.
Gronda Britannia resta fidaivla a la NATO
Il primminister partent da la Gronda Britannia, David Cameron, ha accentuà, che la Gronda Britannia restia colliada cun la defensiun da l’Europa. La Gronda Britannia na volvia betg il dies a l’Europa ed era betg a la segirtad e la defensiun europeica, ha ditg Cameron.
Nus na vulvain betg il dies a l’Europa.
Schuldada e dialog - la NATO e la Russia
In dals temas centrals a Warschau è la relaziun da la NATO cun la Russia. Malgrà il rinforzament da sias truppas en l'Europa da l'Ost vul la NATO tschertgar il dialog cun la Russia. «La guerra fraida è istorgia e duai restar istorgia» ha ditg il secretari general da la NATO, Jens Stoltenberg, avant il cumenzament da l'inscunter suprem a Warschau.
La guerra fraida è istorgia e duai restar istorgia.
L'allianza militara dal vest stoppia tschertgar in dialog raschunaivel cun Moscau ha ditg Stoltenberg vinavant. Quai duai ella er far per sminuir il privel da malchapientschas militaras.
Obama: smanatscha da «l'agressiun da la Russia» envers l'Ucraina
En in artitgel dad osp ha scrit il president american en la «Financial Times» che l'inscunter pudess daventar il mument pli impurtant per la NATO suenter la fin da la guerra fraida. El ha renvià dad ina vart a las attatgas da terror e la crisa da fugitivs. Da l’autra vart smanatschia «l’agressiun da la Russia» envers l’Ucraina «nossa visiun dad in’Europa che è intacta, libra ed en pasch».
Rinforzament da la NATO envers ost
En il center dals dus dis da l’inscunter suprem stà in rinforzament da la preschientscha militara da la NATO en l’Europa da l’ost. Uschia vegn a decider la NATO da staziunar a partir da l’onn proxim quatter battagliuns cun mintgamai radund 1’000 schuldads en ils trais pajais baltics ed en Pologna.
En pli vegn la NATO a communitgar che la protecziun da rachetas per ils stadis europeics saja pronta. La NATO renviescha a pussiblas attatgas da rachetas dal Proxim Orient. La Russia vesa questa protecziun dentant era sco smanatscha da sia atgna segirtad.
RR novitads 11:00++
