Siglir tar il cuntegn

Header

cuntegn

Exteriur La Nigeria - in pajais cun bleras fassettas

La Nigeria è in pajais cun passa 170 milliuns abitants. Il pajais cun la pli gronda populaziun en l’Africa. Ed in pajais che chaschuna dapi mais, schizunt onns, adina puspè lingias grassas er qua en Svizra.

La gruppaziun da terror Boko Haram derasa enorma brutalitad cun sia finamira dad endrizzar in stadi islamic en il nord dal pajais. Milliuns Nigerians, cunzunt muslims, èn pertutgads da la violenza. Ruedi Küng l’anteriur correspundent da l’Africa dad SRF va schizunt da quai anor che blers vegnan sfurzads da sa participar al terror. Uffants cun tschintas da bumbas vegnian tramess sin fieras u là nua ch’i ha blera glieud. E schizunt entirs vitgs vegnan sfurzads cun violenza. Ins na sappia betg s’imaginar cun tge brutalitad che Boko Haram agescha per cuntanscher lur finamira uffiziala d’endrizzar in stadi islamic.

Matta cun faziel verd, davos in tanc e schuldads.
Legenda: Schuldads da la Nigeria e dal Tschad han deliberà la citad Damasak da la Boko Haram. Reuters

«Boko Haram pon ins cumparegliar cun il SI»

La finamira dal uschenumnà Stadi islamic SI, che agescha en la Siria, è numnadamain la medema sco quella da Boko Haram uschè Ruedi Küng: Endrizzar in stadi islamic. Er tge che pertutga la brutalitad enorma pon ins cumparegliar las duas organisaziuns. En la Nigeria èn milliuns pertutgads dal terror. L’armada emprova dapi onns da cumbatter Boko Haram. I saja tenor Ruedi Küng dentant strusch da chapir ch’ina armada uschè bain scolada e cun uschè blers daners (fin 6 milliardas dollars) n’è betg capabla da franar Boko Haram. Qua vegnia er il chavazzin corrupziun en il gieu. I saja bain pussaivel che blers daners van en ils satgs dad auts funcziunaris dal militar.

«I po anc ir mais, forsa onns fin che Boko Haram è eliminà»

Goodluck Jonathan en vestgì cler blau discura en dus microfons
Legenda: Il president nigerian Goodluck Jonathan. Reuters

Co ch’il cumbat va ora dependa tenor Ruedi Küng er da las elecziuns che vessan gia gì dad esser ch’èn dentant vegnidas spustadas dal president actual Goodluck Jonathan. Ruedi Küng manegia che Jonathan ha spustà las elecziuns per avair dapli schanzas da vegnir reelegì. El e ses adversari Muhammadu Buhari sajan stads tar las davosas retschertgas circa tuttina ferms. Cun spustar las elecziuns possia quai esser che Jonathan emprovia da puspè daventar pli populars. La finala dependia il futur da la Nigeria da la regenza e con fitg che quella cumbatta Boko Haram.

La Nigeria n’è betg mo terror e conflicts

Che la Nigeria ha er bellas varts pudess ins bunamain emblidar tar tut quels rapports negativs. Dentant è la Nigeria in grond pajais. Ils conflicts èn per gronda part en il nord – en il sid na percorscha la glieud betg uschè bler. Ed er en la chapitala da la Nigeria, Abudja, nua ch’il ambassadur substitut Daniel Cavegn viva, na sentan ins betg bler da Boko Haram.

Riva cun sablun e crappa
Legenda: Riva da l’Ocean Atlantic a Lagos, il center commerzial da la Nigeria. Reuters

Cler ins na sappia betg cumparegliar la Nigeria cun la Svizra tge che pertutga la segirtad. Dentant sappian el e sia famiglia viver relativ normal. Cumprar en, ir a mangiar ed ir cun auto na saja nagin problem – els emprovian dentant dad evitar grondas massas da glieud sco per exempel fieras u sumegliant. La Nigeria saja in pajais fitg bel, il nord cunfinescha cun la Sahara ed è plitost sitg cun culms, il sid è dentant tropic e cunfinescha cun l’Ocean Atlantic. na betg mo la geografia plascha a Daniel Cavegn, mabain er la cultura ch’è fitg ritga. Passa 500 linguas vegnan discurridas e la glieud saja fitg averta e positiva.

Artitgels legids il pli savens