A Moscau è vegnì organisà ina parada militara. Las mesiras da segirezza èn extremas pervi dals blers chars armads, las rachetas ed ils aviuns. Tar la preschentaziun da las armas marschan passa 16’000 schuldads sur la plazza cotschna.
Da la partida è era stà il schef da stadi da la China Xi Jingping. Ils blers schefs da stadi da l'UE ed ils Stadis Unids boicotteschan però questa parada en vista al conflict en l'Ucraina.
L’Uniun sovietica aveva gì en il cumbat cunter il faschissem il pli grond dumber d’unfrendas cun passa 27 milliuns morts.
Per in sistem mundial da segirtad senza blocs militars
Il president Russ Wladimir Putin è s'exprimì en ses pled a Moscau per ina sistem mundial da segirtad senza blocs militars. Ils principis da l’urden suenter la Segunda Guerra mundiala sajan vegnids violads adina pli savens, ha el crititgà.
Da l'autra vart ha Putin ludà ils Alliads dal vest per lur coaliziun encunter la dictatura da Hitler. La Russia saja engraziaivla a la Gronda Britannia, la Frantscha ed ils Stadis Unids da l'America.
RR novitads 10:00