Varga 60 onns regina e fitg populara
Gia cun 25 onns è Elisabeth vegnida Queen. Tar la populaziun Britannica è ella fitg populara. Sco quai che Mariano Tschuor, enconuschider da famiglias roialas di, è il pievel britannic in pievel che ha gugent l'istorgia.
La Queen è preschenta dapi passa 60 onns sin bancnotas u sin marcas. Tuttenina sa la glieud tgi che quai è ed ha er gugent questa persuna.
Ella discurra fitg pauc, quai ch'ella di ha però paisa.
Mintg’emna s’entaupa la Queen Elizabeth II. cun il primminister da la Gronda Britannia per in discurs. Là na vegni betg mo fatg baterlims, di Mariano Tschuor.
Durant quest discurs vegn er discurri davart las fatschentas politicas dal mintgadi. Ella saja insatge sumegliant sco la buna vusch dal parlament. La Queen saja numnadamain ina persuna cun immens blera experientscha: In’experientscha da 60 onns regina.
9 fatgs curios davart la Queen
- Mintga cign en Engalterra tutga a la Queen. Ils cigns vegnan dumbrads e controlladsmintg’onn. Er ils delfins e las balenas enturn l’insla tutgan dapi il 1324 a la Queen.
- La Queen ha durant sia entira vita dà gnanc ina suletta intervista.
- L’um da la Queen, Prince Philip numna sia dunna betg «charina» u sumegliant, para ch’el numna ella «sausage», tge che munta liongia.
- La Queen n’ha mai daners cun ella. Ella na posseda er betg in pass u in permiss d’ir cun auto, tuttina dastga ella ir cun auto. Sco suletta persuna en Gronda Britannia dastga ella ir cun auto senza permiss.
- La Queen communitgescha via sia tastga cun ses servients. Sch’ella metta la tastga dad in bratsch sin tschel munta quai para ch’ella ha lungurus. Sch’ella metta la tastga suenter tschaina sin maisa lura munta quai ch’ella less ir en 5 minutas.
- En la segunda guerra mundiala è la Queen vegnida scolada sco mecanista d’autos. Para ch’ella savess schizunt midar ora in accumplament.
- Ina servienta ha da «currer en» ils novs chalzers da la Queen per ch’ella na survegnia betg mal ils pes.
- La Queen ha scrit ses emprim mail gia il 1976 davent d’ina basa militarica.
- La Queen lascha para cuser en ils urs da sias rassas pitschnas paisas per che las rassas na s’auzan betg cura ch’i sufla.