La regenza da la Spagna vul surpigliar la pussanza en la Catalugna e cun quai privar la regenza regiunala ed ils separatists da lur pussanza. En ina sesida extraordinaria haja il cabinet decidì, d'acitvar l'artitgel 155 da la constituziun. Quai ha ditg il primminister da la Spagna Mariano Rajoy la sonda a Madrid. La regenza spagnola po uschia schliar il parlament catalan e fixar novas elecziuns entaifer sis mais. Las mesiras repressivas ston anc vegnir approvadas dal senat e da la chombra auta dal parlament.
Decisiun da Madrid provochescha demonstraziuns
Pervia da questa decisiun dal primminister Mariano Rajoy èn radund 450'000 aderents da l'independenza ids a Barcelona sin via. Els protestan cunter la regenza centrala a Madrid. Plinavant pretendan els la liberaziun da dus activists che la polizia aveva arrestà glindesdi passà.
Mesiras suenter l'ultimatum
La Catalugna ha laschà stritgar la gievgia passada in segund ultimatum: La regenza spagnola aveva pretendì da la regenza regiunala da declerar, schebain ella haja proclamà l'independenza u betg. En l'istorgia da la democrazia spagnola che dura dapi 40 onns, fiss quai l'emprima giada che la regenza centrala privescha ina regenza regiunala da la pussanza e fixescha là novas elecziuns.
RR novitads 14:00+