La Russia serra las portas ad Amnesty International

En la chapitala da la Russia, Moscau, han las autoritads serrà senza preavis il biro da l'organisaziun per dretgs umans Amnesty International.

Purtret d'in isch cun davantvart in tatgader uffizial. Bild in Lightbox öffnen.

Legenda da maletgs: Uschia guardava la porta dal biro d'Amnesty International or cura ch'ils lavurers èn arrivads. Keystone

Las serras sajan vegnidas midadas ed il provediment electric taglià atras. I haja gì num che las localitas appartegnian a la Federaziun Russa. Amnesty duai sa drizzar a l'administraziun da la citad per survegnir ulteriuras infurmaziuns. Il biro dad Amnesty sa chattia dapi 20 onns en quest lieu.

In pledader dal Kreml ha ditg, ch'el n'haja naginas infurmaziuns davart quest tema. El audia per l'emprima giada da questa chaussa.

Controllas severas per organisaziuns

Organisaziuns nunguvernamentalas vegnan dapi onns controlladas penetrantamain en Russia. Sche talas organisaziuns vegnan finanziadas da l'exteriur ed exequeschan ina «lavur politica», ston ellas sa registrar en Russia sco «agents da l'exteriur».

Il matg da quest onn è vegnì realisà ina lescha che organisaziuns da l'exteriur pon vegnir serradas sch'ellas mettan en privel la segirezza naziunala u las leschas da la constituziun.

RR novitads 16:00