In pajais suenter l'auter serra la ruta dal Balcan. Era la Macedonia ha serrà ils cunfins per ils fugitivs cumplettamain. Quai rapportan las medias localas sa referind a la regenza. Tge che capita cun ils radund 13milli fugitivs ch'èn il mument en il nord da la Grezia, n'è betg cler.
Uschia suonda il pajais a l’exempel da la Slovenia, la Croazia e la Serbia che na laschan betg pli traversar ils fugitivs. Sulettamain fugitivs cun in pass valaivel pon anc entrar en quests pajais. Uschia applitgeschan els puspè las reglas da Schengen.
L'onn passà èn passa 1 milliun fugitivs arrivads sur la ruta dal Balcan en l'Austria e la Germania.
Sco reacziun sin questas mesiras ha l'Ungaria tramess dapli schuldada e polizists al cunfin en il sid dal pajais. Plinavant ha l'Ungaria proclamà il stadi da crisa per l'entir pajais.
RR novitads 16:00