Siglir tar il cuntegn

Header

cuntegn

Exteriur La Svezia serra praticamain il cunfin

La cultura da far bainvegni è para passada. La regenza svedaisa vul pli severas reglas d’asil. Il primminister Stefan Lövfen ha annunzià in pachet da mesiras e leschas ch’impedescha per gronda part l’immigraziun da fugitivs.

Il vent ha para era midà en il pajais, il pli avert da l’Europa. L’atun miaivel e sulegliv è a fin ed empè da pudair star en scolas ed hotels vits, ston ils fugitivs da la Siria da l’Afganistan ussa durmir en tendas u perfin giuadora.

Frain d’urgenza

Prest 100’000 fugitivs èn vegnids be ils ultims dus mais en la Svezia ed han manà là il stadi da bainstar social als cunfins da quai ch’el vegn da prestar.

Ussa tira la regenza verd-cotschna, ch’aveva adina appellà per l’umanitad e l’avertadad, il frain d’urgenza. Il primminister socialdemocrat Stefan Löfven ha declerà da vul dublegiar il dumber dals emploiads da la guardia da cunfin e ch’ins vegnia a dar be pli a paucs fugitivs da quota ina permissiun da dimora.

Be pli il minimum

«Nus reducin nossas prestaziuns per ils fugitivs sin il minimum absolut», ha Löfven accentuà en la speranza ch’ils fugitivs tschertgan uschia in auter pajais da dimora.

La lescha d’asil duai vegnir adattada a quella da l'UE vul dir damain fugitivs survegnan il dretg da dimora e il trair suenter las famiglias vegn engrevgià.

Artitgels legids il pli savens