Siglir tar il cuntegn

Header

cuntegn

Exteriur La Svizra è il pajais da las dronas

A la CEBIT a Hannover, la pli gronda exposiziun spezialisada da tecnologia d'infurmaziun, è la Svizra il mument osp spezial, ed ella preschenta duas dronas.

Johann Schneider-Amman cun 2 chauns e 3 politichers a l'avertura da la CeBIT.
Legenda: La Svizra è giasta speciala a la CeBIT - il president da la Confederaziun Johann Schneider-Amman vegn bainvegnì en Germania. Keystone

Il "Sky"m è in ballun rodund che sgola sc'in zeppelin, ins po dentant diriger el precis sc'ina drona convenziunala.

Questa drona è segira. Sch'ins lascha sgular ella sur in stadion da ballape, per far in video, ed ella croda giu da tschiel, lura n'è quai betg malsegir.

Il "Wingtra" perencunter è ina sort spert aviun, cun el pon ins sgular lunsch. Uschia po in pur laschar sgular ella sur ils funs per mirar, nua ch'i dovra anc aua e cultim.

Piuniers

Dapi 15 onns sa fatschenta la Svizra cun dronas, els sajan forsa stà ils emprims che hajan laschà sgular in tal apparat, di Roland Siegwart, professer per sistems autonoms a l'ETH a Turitg.

audio
Bunura: la Svizra - il pajais da las dronas
ord Actualitad dals 15.03.2016.
laschar ir. Durada: 2 minutas 44 Secundas.

La China è in grond concurrent

Ils Chinais produceschan sur tut dronas per consuments, che vulan laschar sgular la drona, ni far fotografias ni videos. Apparats intelligents e da precisiun sajan dentant la fermezza da la Svizra, di Siegwart. Las dronas possian crear novas plazzas da lavur.

Futur

Impurtant è che las dronas vegnian pli autonomas ed intelligentas, uschia ch'in pumpier pudess per exempel laschar sgular la drona tras in bajetg, per chattar unfrendas, senza avair ina gronda scolaziun, co sgular dronas. Era dovri investurs che n'han nagina tema d'investir en las dronas. E la finala èsi impurtant da reglar il spazi da l'aria. Tge dastgan las dronas far e tge betg? I valia da chattar ina buna ballantscha tranter igl interess da la publicitad e da l'economia, di Roland Siegwart.

Artitgels legids il pli savens