In onn suenter che l'armada ha surpiglià la pussanza en la Tailanda ha l'organisaziun per dretgs umans, Human Rights Watch, crititgà vehementamain ils novs potentats enturn il manader dal putsch, Prayuth Chan-ocha.
La Tailanda saja daventada ina dictatura. La pussanza saja en ils mauns d'in singul um. Dissidents vegnian persequitads e las medias censuradas. Almain 750 persunas sajan vegnidas tegnidas a ferm ed interrogadas.
L'armada tailandaisa aveva cupitgà avant in onn la regenza da la primministra Yingluck Shinawatra suenter protestas dad emnas. L'opposiziun aveva renfatschà a la regenza corrupziun.
