Il primminister da la Nova Zelanda John Key ha confermà che almain duas persunas sajan mortas dal ferm terratrembel. Il n'ha betg inditgà dapli detagls. Las autoritads han avertì avant in Tsunami. L'emprima unda haja cuntanschì la costa en il nordost da la Nova Zelanda. Quai communitgescha il servetsch da la protecziun civila. Durant las proximas uras possian anc numerusas undas cuntanscher la costa. L'emprima unda da tsunami na stoppia betg esser stada la pli gronda, avertescha la protecziun civila.
Terratrembel da notg
La terra ha stremblì curt suenter mesanotg durant la notg sin glindesdi (temp local). Tar nus eri lura gist mezdi. L'epicenter dal terratrembel è sin l'insla en il sid, 90 kilometers en il nord da la citad Christchurch.
Gia il favrer 2011 era Christchurch vegnì tutgà d'in terratrembel. Lura avevi dà 185 morts.
RR novitads 14:00