Siglir tar il cuntegn

Exteriur La Tirchia duai far dapli

En vista a la crisa da fugitivs vul il president da la cumissiun da l'UE, Donald Tusk, be vegnir encunter a la Tirchia sch'il dumber da fugitivs sa reducescha.

Fugitivs per gronda part oriunds da la Siria spetgan en la Tirchia da cuntinuar lur viadi vers l’Europa.
Legenda: Fugitivs per gronda part oriunds da la Siria spetgan en la Tirchia da cuntinuar lur viadi vers l’Europa. Keystone

Sco quai che Tusk scriva en ina brev als stadis commembers, sajan concessiuns be giustifitgadas sche questa finamira saja cuntanschida. La Tirchia stoppia perquai procurar, ch'il dumber da fugitivs che sa mettan sin via vers l'Europa sa reduceschia. La Tirchia è il pli grond pajais da transit per fugitivs.

Da quintar cun blers ulteriurs fugitivs

Era sch’il chatsch da fugitivs laschia suenter durant l’enviern, stoppia l’Uniun europeica esser pinada per la primavaira che pudessi purtar ulteriuras undas da fugitivs. Tenor Donald Tusk è l’Europa fitg attractiva perquai ch’ella è uschè bain accessibla.

La Tirchia fa pretensiuns envers l'UE

La regenza tirca pretenda agid per dumagnar la crisa da fugitivs, sco era progress tar las tractativas davart in'adesiun a l'UE. La crisa da fugitivs vegn ad esser in tema central da l'inscunter suprem da l'UE da gievgia che vegn.

RR Novitads 06:00