Siglir tar il cuntegn

Header

Navigaziun

Logo d'interpresa.
Legenda: La procura publica franzosa investighescha cunter il concern da cement. Keystone
cuntegn

Exteriur Lafarge Hohlcim renviescha reproschas da finanziar il terrorissem

Il concern da cement Lafarge Holcim sa dosta cunter investigaziuns da la procura publica franzosa. Quella renfatscha numnadamain al concern franzos-svizzer d’avair finanzià il terrorissem en la Siria.

Tenor la «Sonntagszeitung» haja Lafarge Holcim fatg recurs tar ina dretgira a Paris, malgrà ch'il concern aveva concedì d'avair fatg pajaments da protecziun e da liberaziun. Las renfatschas na correspundian betg a las responsabladads dal concern.

Investigà vegn pervi da finanziaziun da terrur, sustegniment da crims cunter l'umanitad, periclitaziun da la vita d'auters e surpassament da prescripziuns da sancziuns da l'UE cunter gruppas islamisticas en la Siria.

Il mars 2017 aveva il concern concedì ch’ils responsabels d’ina fabrica da cement en Siria hajan collavurà cun gruppas terroristicas per garantir il manaschi. Il concern ha pajà en tut 15 milliuns dollars. Ina part da quests daners ha la milissa terroristica Stadi Islamic survegnì. La finamira principala saja dentant stada la protecziun da la fabrica, che ha custà bunamain 700 milliuns dollars a Lafarge. La culpa sajan ils responsabels locals, quai na pertutgia betg la centrala dal concern a Paris.

RR novitads 9:00