Siglir tar il cuntegn

Header

cuntegn

Exteriur Las forzas da segirtad han evità pliras attatgas da terror

Las forzas da segirtad da la Gronda Britannia han il davos onn pudì evitar pliras attatgas da terror. Tenor l'emettur da televisiun Sky News e la gasetta Times era forsa er planisà in'attatga sin la primministra Theresa May.

Planisà era tenor atgnas retschertgas da las medias in'attatga cun material explosiv avant la Dowing Street ed alura in'attatga precisa sin la primministra. Duas persunas sajan vegnidas arrestadas e preschentadas a l'inquisitur. Ina posiziun uffiziala tar ils rapports da medias na datti dentant anc betg.

Curt avant il rapport da las medias aveva il manader dal servetsch secret intern MI5 Andrew Parker communitgà che las forzas da segirtad hajan pudì evitar nov attatgas da terror ils ultims 12 mais.

Il servetsch secret examinescha 500 cas da terror

E tuttina è la Gronda Britannia quest'onn stada unfrenda da tschintg attatgas terroristicas. Tar quellas èn mortas 36 persunas. Parker ha punctuà avant in pèr emnas ch'il privel da terror islamic saja uschè grond sco anc mai. I dettia «in augment dramatic da smanatschas» en la Gronda Britannia. Il servetsch secret intern examineschia il mument 500 cas che pertutgan 3'000 extremists.

L'attatga a Manchester avess forsa pudì vegnir evitada

Tenor il rapport da mardi avess l'attatga a Manchester dal matg forsa pudì vegnir evitada. L'assassin Salman Abedi era trais giadas vegnì en il visier dal servetsch secret. Ina giada curt avant l'attatga. Per la fin da matg era planisà in inscunter dal servetsch secret per valitar il privel entras l'um da 22 onns. Nov onns avant l'inscunter ha il Brit cun ragischs libanaisas mazzà 22 persunas cun ina bumba tar in concert.

RR novitads 09:00

Artitgels legids il pli savens