Dad ina disgrazia da lavina en las Alps franzosas èn almain 3 persunas mortas. Tar las unfrendas sa tractia da 2 scolars da 14 e 16 onns e dad 1 um ucranais che na faschevia betg part da la gruppa. Quai rapportan las autoritads localas.
Plinavant saja 1 persuna vegnida blessada grevamain. La disgrazia è capitada en il territori da skis da «Les Deux Alpes» en il sidost da la citad da Grenoble. La gruppa oriunda da Lyon è sa cumponida da 19 scolars e lur magister.
Passa 60 gidanters e 4 helicopters sajan stads en acziun. Las forzas da segirezza tschertgian anc adina ulteriuras unfrendas.
La disgrazia è capitada sin ina pista da skis serrada. Las circumstanzas da la disgrazia na sajan anc betg scleridas, uschia las autoritads localas vinavant.
RR novitads 20:00 / 14.01.2016, 06:00