Questa saira mussa SRF2 la documentaziun dispitaivla «Leaving Neverland» che recapitulescha anc ina giada las reproschas d'abus sexual envers il King of pop barmier Michael Jackson. Tenor il correspundent da musica da SRF Gregi Sigrist che ha gia vesì la documentaziun, na sappian ins betg propi tge crair suenter avair udì las istorgias da Wade Robson che ha oz 36 onns e da James Safechuck che ha oz 41 onns.
Pon ins crair u betg?
Els omadus raquintan, co ch'els han emprendì d'enconuscher Michael Jackson, co lur famiglias èn vegnidas en ina relaziun cun il superstar, co els èn daventads amis e co Michael Jackson duai lura avair malduvrà els sexualmain sur plirs onns. E quai cun exempels fitg detagliads, scenas co ch'els hajan stuvì star davant giu e trair dapart las vistas tgil durant che Michael Jackson masturbava. E quai saja stà be l'entschatta da l'abus.
Dentant, pon ins crair ad ils dus umens? «En il film na vegn numnadamain nagin da la vart cuntraria tar pled. Insumma nagin. E la documentaziun è bajegiada si uschia, ch'ins vul crair a las unfrendas, dentant ins na sa mai tge ch'è la vardad», di Sigrist. I pudessia er esser che Michael Jackson saja innocent. Sigrist na vul e po er betg giuditgar davart il cuntegn da la documentaziun. «Igl è simpel da crair l'istorgia, igl è dentant er simpel da betg crair l'istorgia.»
RR actualitad 07:00