Siglir tar il cuntegn

Header

Navigaziun

Legenda: Tadlar il audio Mezdi: Necrolog – Niki Lauda. Durada 02:23 minutas.
02:23 min, Sportissimo dals 26.05.2019.
cuntegn

Legenda da furmla 1 Niki Lauda è mort

Il traidubel campiun mundial da furmla 1 è mort. L'Austriac da 70 onns saja spartì paschaivlamain il glindesdi en il ravugl da sia famiglia. Quai ha communitgà ina pledadra da la societad aviatica Laudamotion en num da la famiglia.

L'um da 70 onns cun il chepi cotschen ha dapi ses grond accident il 1976 al Nürburgring adina puspè gì difficultads da sanadad. Quella giada era el stà durant bunamain ina minuta en las flommas. Sper las fermas blessuras da la pel era er il pulmun vegnì ferì. Sco consequenzas tardivas da ses accident ha el duas giadas stuì laschar transplantar in gnirunchel.

La stad passada ha el lura er stuì laschar transplantar in pulmun. Suenter ina grippa ha el il schaner passà anc ina giada stuì vegnir tractà en l'ospital. Anc il favrer a chaschun da ses 70avel anniversari aveva el communitgà en in messadi da video, ch'el turnia enavos e ch'i giaja lura cun tutta forza puspè amunt cun el.

Trais giadas campiun

Niki Lauda è daventà trais giadas campiun mundial da furmla 1 – il 1974, 1977 e 1984. El è però er stà interprendider ed ha fundà la societad aviatica «Laudamotion». Ultimamain era l'Austriac er en il cussegl d'administraziun dal team Mercedes da furmla 1.

Lauda ha ord sia emprima lètg dus figls ed ensemen cun sia segunda dunna, Birgit Lauda, schumellins dad otg onns.

RR novitads 06:00