Il champ da fugitivs Moria sin l'insla grecca Lesbos è ars bunamain dal tuttafatg. Quai suenter che plirs incendis èn ruts or la notg sin mesemna. Vents da fin a 70 km per ura han la damaun anc ina giada derasà las flommas.
Gia durant la notg han las autoritads cumenzà ad evacuar il champ, suenter che containers abitads ardevan. Davart persunas blessadas u schizunt mortas na datti anc naginas infurmaziuns. Er davart la raschun per ils incendis na datti anc betg infurmaziuns confermadas. La regenza discurra d'in fieu intenziunà.
Entant ha la regenza tudestga sco er l'organisaziun d'agid per migrants da las Naziuns unidas annunzià da porscher agid.
Cas da corona en il champ
Pervi da divers cas da Covid-19 è il champ dapi l'emna passada sut quarantina. Quai ha manà a revoltas: Fertant che tscherts fugitivs vulevan bandunar il champ per betg s'infectar, vulevan persunas infectadas betg bandunar il champ per ir en isolaziun. Quai rapporta l'agentura da novitads greca ANA-MPA.
Il champ da fugitivs Moria è surchargià fermamain. Actualmain vivevan var 12'500 migrants là. Plaz avessi atgnamain be per bun 3'000.