L'emprim aveva il president dal pajais Salva Kiir ordinà in armistizi immediat. Silsuenter ha ses rival, il vicepresident Riek Machar, ditg al radio, che sias truppas chalian da cumbatter.
Dapi la fin dal 2013, mo dus onns e mez suenter l'independenza dal pajais, regia ina guerra civila en il Sudan dal Sid. Ils davos dis hai dà grevs cumbats en la chapitala Juba cun blers morts.
Ban pretenda dapli engaschi internaziunal
En vista als cumbats ha il secretari general da l’ONU Ban Ki Moon pretendì d’augmentar la missiun da pasch da l’ONU. Ultra da quai vul el in embargo d’armas e sancziuns cunter il Sudan dal Sid.
Davart in’eventuala demissiun dal president Salva Kiir e dal vicepresident Riek Machar stoppia il suveran decider, ha Ban ditg a New York. La violenza mussia dentant era ch’ils manaders dal pajais hajan desdi.
RR novitads 22:00