Millis da persunas han demonstrà la dumengia en la chapitala libanaisa Beirut per elecziuns parlamentaras anticipadas.
Perditgas han rapportà da confruntaziuns cun la polizia. Las forzas da segirtad avevan mobilisà fitg blera glieud.
Dapi il fanadur datti gia protests cunter la regenza. Cumenzà ha tut pervi da rument che n'è betg vegnì rumì. L'administraziun n'ha ditg betg chattà ina soluziun.
Ils demonstrants rinfatschan a l'entira classa politica corrupziun ed incumpetenza. I sa tracta dals emprims protests da massa en il Libanon, nua che l’appartegnientscha tar partidas u tar gruppas religiusas na gioga nagina rolla.
