Siglir tar il cuntegn

Header

cuntegn

Exteriur Libia sa cunvegn a regenza unitara

En la Libia èn las partidas da conflict sa cunvegnidas ad ina regenza unitara per l’entir pajais. Quai han ils responsabels communitgà, scrivan medias en Libia. Il nov cabinet duai en tut avair 32 ministers.

Questa regenza unitara era gia prevesida en il plan da pasch da las Naziuns Unidas ch’era vegnì suttascrit il december da l’onn passà.

A partir dal 2011 - suenter ch’il dictatur Muammar Gaddafi era vegnì chatschà – regia en la Libia ina guerra civila. Pliras gruppaziuns armadas cumbattan en il pajais ina cunter l’autra. Profità ha cunzunt la milissa da terror Stadi Islamic. Cun questa regenza duai la guerra civila vegnir terminada.

Spetgas dal vest e critica da l'intern

Il vest spetga da la nova regenza ina fin dals cumbats e ch’i vegnia agì pli rigurusamain cunter il Stadi Islamic. La Germania da sia vart n’excluda betg da sa participar ad in’acziun militara internaziunala en il pajais; quai en il cas ch’ina tal’acziun sustegness ina regenza unitara.

Entant datti era critica cunter questa regenza unitara. Il process saja stà memia svelt e betg tuttas gruppaziuns en la Libia sajan represchentadas avunda. Dus commembers dal cussegl n'han betg suttascrit il decret. In dad els ha declerà che l'ost dal pajais saja sutrepreschentà.

RR novitads 16:00

Artitgels legids il pli savens