Tecnicamain saja anc pussaivel da limitar il stgaudament dal clima sin 1,5 grads. Per cuntanscher quella finamira stoppia vegnir agì fitg svelt sin tut ils champs. A questa conclusiun vegn in rapport extraordinari dal Cussegl mundial dal clima da la Naziuns Unidas.
Uschia stoppian las emissiuns globalas da CO2 fin il 2030 sa sbassar per 45% cumpareglià cun il 2010 ed il 2050 esser sin null. La cumpart d'energias regenerablas stoppia cuntanscher l'onn 2050 ina cumpart da 70 fin 85%.
En la cunvegna dal clima da Paris è vegnì fixà avant trais onns da limitar il stgaudament climatic cleramain sut 2 grads. Surtut ils pitschens pajais insulars avevan pretendì ina limita dad 1,5 grads. Il rapport extraordinari vala sco basa per la conferenza mundiala dal clima il december a Kattowitz en Pologna.
RR novitads 06:00