Il suspectà è vegnì arrestà en il quartier dal port da Dover. I saja ina impurtanta arrestaziun, di Neil Basu dal cumbat cunter terror da la polizia. L'arrestaziun saja succedida tenor la lescha da mesiras antiterroristicas.
La polizia augmentia fermamain sia preschientscha en l'entira Gronda Britannia. Er il militar vegn en acziun per proteger indrizs e carstgauns. Ultra da quai vegn ins en futur a vesair sin vias ed en trens dapli policists armads. En la Gronda Britannia vala il pli aut grad d'avertiment da terror, quai che munta ch'i pudess dar mintga mument in'attatga terroristica.
Passa 20 persunas èn vegnidas blessadas
Ina bumba fatga sez è explodida il venderdi en damaun curt suenter las 8 a la staziun da metro Parsons Green a Londra. Almain 22 persunas èn vegnidas blessadas e tractadas en ospitals. Morts hai dà nagin perquai che la bumba fatga sez n'è para betg explodida endretg. Quai era la 5avla attatga da quest onn en la Gronda Britannia.
RR novitads 12:00