Siglir tar il cuntegn

Header

cuntegn

Exteriur Londra suenter l’incendi – May sin il lieu, tschertga interrutta

Il di suenter la catastrofa da fieu en in sgrattatschiel a Londra han ils pumpiers stuì interrumper la tschertga dad ulteriuras unfrendas. Ils urs dal bajetg na sajan pli segirs, ha dit la scheffa dals pumpiers. Entant ha la primministra britannica Theresa May annunzià in'examinaziun precisa.

La damaun, passa 24 uras suenter il grond fieu, sorta anc adina fim dal bajetg. I dettia anc gnieus da fieu ha ditg Dany Cotton, la scheffa dals pumpiers da Londra. Enfin al mument nua che la tschertga è vegnida memia privlusa pervi da la statica hajan ils pumpiers pudì intercurir curtamain las 24 auzadas dal Grenfell Tower.

Tema, che cifra dad unfrendas crescha

Enturn gentar sa verifitgeschan las temas da las autoritads: Ellas actualiseschan la cifra da persunas ch'èn vegnidas per la vita en il fieu grond en il Grenfell Tower da 12 sin 17 persunas.

Tenor l’emettur britannic BBC na spetgian las forzas da salvament betg pli da chattar anc persunas en vita. La scheffa dals pumpiers da Londra di, ch’i sa chattia anc adina ina «cifra nunenconuschenta» da persunas en la ruina dal Grenfell Tower.

Dapli che 30 persunas sajan anc en ils ospitals, 17 dad ellas èn en stadi critic. Sin las 24 auzadas eran 120 abitaziuns.

Primministra May visita il lieu da la catastrofa

La primministra Theresa May ha annunzià la gievgia a bun'ura in'examinaziun precisa. Sch'i saja da trair consequenzas ord il fieu lura dettia mesiras ha ella ditg. La BBC rapporta da dumondas pertge ch’il fieu haja pudì sa derasar uschia spert.

May ha onurà l'engaschi da las forzas da salvament e condolà als pertutgads. La gievgia è ella ida ad ina «curta visita privata» sin il lieu da la disgrazia per sa far sez in purtret. Bleras persunas n’hajan nagin lieu pli, nua ch’ellas possian ir, ellas hajan pers tut, ha raquintà May.

Tge che ha causà la catastrofa da fieu en il sgrattatschiel da 24 auzadas n’è al mument betg cler. Envers las medias aveva Scotland Yard exclus ier mesemna in motiv terroristic.

RR novitads 06:00

Artitgels legids il pli savens